ტყიბულის მუნიციპალურ თეატრში, ინტეგრირებული თეატრის ,,აზდაკის ბაღის” სპექტაკლის -,,შერეკილების“ პრემიერა გაიმართა. რეზო გაბრიაძის ნაწარმოების მიხედვით დადგმული სპექტაკლის სახეცვლილი ვერსია, განსხვავებული და ახლებური ხედვით, რეჟისორმა ბაჩო გაბრუაშვილმა დადგა, რომლის პრემიერა სცენარის ავტორის მშობლიურ მხარეში, ტყიბულში შედგა.

  ინტეგრირებული სპექტაკლი შშმ პირებსა და პროფესიონალ მსახიობს აერთიანებს, სადაც ადამიანებთან ერთად მარიონეტი შშმ თოჯინებიც თამაშობენ. სპექტაკლში პერსონაჟები თითქმის არ საუბრობენ და სათქმელს კომიკური სცენების საშუალებით გადმოსცემენ.

  ,,შერეკილების“ პრემიერამ, რომელიც ტყიბულის მუნიციპალიტეტის მერიის ფინანსური მხარდაჭერით გაიმართა, ანშლაგით ჩაიარა. წარმოდგენას მუნიციპალიტეტის მერი, დავით ჩერქეზიშვილი, ადგილობრივი ხელისუფლების წარმომადგენლები და შეზღუდული შესაძლებლობის მქონე პირები ესწრებოდნენ.